Category: Afrikaans

“… die Bruid, die Vrou van die Lam”  –   Open. 21:9

Volgens 1 Kor. 10:1 – 11 is Ou Testamentiese Israel ‘n voorbeeld van die Nuwe Testamentiese Kerk.  In die O.T. was Israel eerstens ‘n Bruid en toe ‘n Vrou.  Dit is ‘n tipe en voorbeeld van die Kerk as die Nuwe Testamentiese Verheerlikte Israel (Gal. 6:16), en wel onderskeidelik as die Bruid en die Vrou.

In die O.T. was Israel JaHUaH se Uitverkorene uit al die volke (Ex. 19:4 – 6) en het Hy Hom aan Israel verbind soos met ‘n verlowing tussen ‘n man en sy uitverkore meisie.  Die volk het toe vir Hom “ja” gesê (Ex. 19:8).  Daanà het hulle die Tien Woorde/Gebooie as verbondsteken ontvang en dis in die verbondsark geplaas. 

Diè verlowing het gebeur by Sinai, in die woestyn.  Die Bruidstydperk is dus die woestyntydperk.

Sedert Dawid egter Jerusalem as die aanbiddingsplek en hoofstad gevestig het toe hy die verbondsark na Sion in Jerusalem toe gebring het (wat gepaard gegaan het met feestelike aanbidding, vgl. 1 Kron. 15 – 16 met Jer. 33:11 en Open. 19:9), is daar dikwels deur die profete na Jerusalem as “die Vrou” van JaHUaH verwys, meestal as die ontroue Vrou.  Dit behels die inwoners van Jerusalem, nl. die volk.

In die N.T. vind daar ooreenkomstig ook ‘n “verlowing” plaas in Hand. 2 (soos by Sinai) met die verheerlikte Israel as “Uitverkorene” (Heb. 12:18 – 24, Joh. 15:16 – 17, Ef. 1:4).  Die Bruid is diè wat “ja” gesê het toe hulle JaHUsha as die Messias aanvaar het soos wat Sy dissipels gedoen het en daarna het hulle die Gees ontvang terwyl hulle in Jerusalem gewag het.  Die uitstorting van die Gees is die teken van die verlowing, want die Gees is die Pand of bewys daarvan soos wat ‘n ring dit vandag is (Ef. 1:13 – 14).

As Bruid is elke gelowige in JaHUsha nou nog“in die Woestyn”, want ons Bruidegom is eers na Sy Vader se huis toe om te gaan plek berei vir Sy Bruid (Joh. 14:2 – 3), maar as Hy weer kom met die blaas van die laaste basuin om haar te kom haal, vind die Bruilof/Bruilofsmaal plaas (Open. 19:9) en die Bruid word nou ‘die Vrou van die Lam’.  Die Vrou van die Lam word die “nuwe Jerusalem” genoem(Open. 21), soos wat ou Jerusalem eens die Vrou was.  Hierdie vrou is nie ‘n ontroue vrou nie, maar is afgesonder en sy was haar haar klere en maak dit wit in die bloed van die Lam (Open. 7:14).  Die Vrou kry dan ook haar man se Naam (Open. 22:4), sowel as bruidskatte en Sy regeer saam met Hom, want Hy is die Koning van die konings.

Toepassing 

Ou Jerusalem het gehoereer.  Die profete het dikwels oor Jerusalem as die ontroue vrou wat gehoereer het geskryf en Hosea moes ‘n hoervrou trou as illustrasie.  JaHUaH het toe van Sy volk geskei (Jer. 3:8 – 10) en toegelaat dat sy weggevoer word, weg uit Jerusalem, weg uit Israel, weg van Hom af.  Maar Hy sal weer genadig wees vir die wat Sy Seun se versoening vir hulle sou aanvaar.  Hulle sal weer Israel kan wees, nie Ou Testamentiese Israel nie, maar wel die Verheerlikte Israel, die Israel van Elohiem (Gal. 6:16) … nie in ou Jerusalem nie, maar as die nuwe Jerusalem van daar bo, Gal. 4:22 – 31 (vgl. ook Ef. 2:19 – 22 met Open. 21:9 – 14). 

Daarom het die Vader Sy Gees gestuur om ‘n bruid vir Sy Seun te soek (soos wat Abraham vir Eliëser gestuur het om vir Isak ‘n bruid te gaan soek het, Gen. 24).  Die Gees wat ons aanpor wanneer ons die evangelie hoor, is soos ‘n huweliksaansoek waarop gereageer moet word.  As mens die “huweliksaansoek” aanvaar word mens deel van die Bruid, die Geliefde van JaHUsha.  Gelowiges in JaHUsha word “Geliefdes” genoem (Rom. 1:7, 16:5, 8).  Johannes was die Geliefde dissipel (Joh. 13:23), en sy naam beteken:  “JaHUaH is genadig”.  Hy is ‘n tipe van die Bruid wat genade ontvang het vanaf JaHUaH en Hom daarvoor bemin.

Die Bruid as ‘n Verheerlikte Israel is wel vanuit ‘n Oorblyfsel (of wortel) van Ou Testamentiese Israel naamlik vanuit JaHUsha, want Hy was ‘n fisiese afstammeling van Dawid.  Hy is uit die wortel en geslag van Dawid, Open. 22:16.  In en deur Hom is die “bestendige genadebewyse van Dawid” (Jes. 55:3 – 9).  Vanuit Hom spruit dus die Verheerlikte Israel (Kol. 1:18), soos toe Dawid eens al die stamme van Israel bymekaar gebring het as ‘n volk toe hy vanaf Jerusalem regeer het, want as Messias is JaHUsha die Gesalfde, soos wat Dawid as tipe ook JaHUaH se gesalfde was.

Ons as die Geliefde, die Bruid van JaHUsha ons Bruidegom, sal uiteindelik in die Huis van die Vader wees.  Hy het gegaan om vir ons plek te berei en dan kom Hy ons haal vir die Bruilof (Joh. 14:2 – 3).  Daarna gaan ons vir ewig saam met Hom wees, maar nou as “die Vrou van die Lam” in die Huis van die Vader, as die ‘nuwe’ Jerusalem (Open. 21:9).

Intussen is ons ook Uitgestuurders om onder die leiding van die Gees aan ander Sy huweliksaansoek mee te deel, soos wat ‘n Eliëser in Gen. 24 dit gedoen het.

Volg nou verder ‘n baie ou preek van Horatius Bonar (1808 – 1889) wat na Afrikaans vertaal is, waarin hy alles mooi saamgevat het.

Vir die PDF, kliek hier.